Archived Stories

18 June, 2015  Ko e Ta'ahine Pilinisesi Angelika Latufuipeka Halaevalu Mata’aho Tuku’aho 'a e fakaafe fakalangilangi 'i he 'aho ni,  Tu'apulelulu 18 Sune, 2015, 'i hono hopoki 'o e vaka pailate fo'ou ko e 'UNGA 'i he 5:30pm 'i he Uafu Kuini Salote; pea mo e fakaola 'o e maama hala fo'ou 'o e Uafu ko Vuna. 'E me'a foki  'i he ongo ouau ko 'eni e 'Eiki Palemia, Hon.'Akilisi Pohiva, Hou'eiki Minisita, kau Fakafofonga 'o e Ngaahi Pule'anga Muli  pea mo e kau fakaafe tokolahi.

'Oku fiefia lahi e Poate 'o e Ngaahi Taulanga 'i he faifaiange pea lava ma'u honau vaka pailate totonu pea fakanaunau kakato ki he pailate. 'E tokoni lahi eni ki he pailate'i mai e ngaahi vaka koloa mo e ngaahi vaka meili ki he Uafu Kuini Salote mo e Uafu ko Vuna. 'E tokoni lahi foki ki he faifatongia 'a e kau pailate. Na'e ngaohi e vaka ko 'eni 'i he fo'u'anga vaka ko e Blue Water Craft Boat Yard 'i Navua, Fisi.

Na'e fe'unga katoa e fakamole ki he vaka ni,  kau ki ai mo hono uta mai ki Tonga mo hono malu'i mo e T$1,150,000, pea fua kotoa pe 'e he Poate 'oe Ngaahi Taulanga. Ko e mahu'inga hoko hake na'e ma'u 'e he Poate Taulanga, na'e fe'unga ia mo e T$4.8 milliona mei Sene, Aositelelia.

Ko e vaka pailate fo'ou ko 'eni 'oku fe'unga holo loloa mo e mita 12. 7 pea maaukupu ko e mita 4.3, fakataha mo e misini tu'u loto pea fakanaunau kakato ki he ngaue pailate.

Kuo fakanaunau fo'ou foki mo e Uafu ko Vuna 'aki ha ngaahi maama 'uhila ke tokoni ki he tu'uta mai 'a e ngaahi vaka meili mo e kau folau 'eve'eva 'i he taimi po'uli. Ko e kalasi 'uhila 'eni ko e LED 'oku si'isi'i ange 'ene kai 'uhila, ma'ama'a ange pea fe'unga mo hotau 'atakai. Na'e fe'unga hono mahu'inga moe T$153,000 pea fua  pe 'e he Poate Taulanga.

-END-

ONGOONGO KE TUFAKI
'Aho: Tu'apulelulu, 18 Sune, 2015

Fetu'utaki kia:   Mrs.Mele Lavemaau
                        Human Resources Manager
                        Ports Authority Tonga
                        Queen Salote Wharf, Nuku'alofa, Tonga
                        Email:This email address is being protected from spambots. You need JavaScript enabled to view it.
                        Telephone:23 168